Sa International Translation Day, nasisiyahan ang Pamahalaan ng NSW na ipahayag ang isang $2 milyong pamumuhunan ng Multilingual NSW. Ito ay isang natatanging programa na dinisenyo upang makapaghatid ng matatag na suporta sa pagsasalin-wikang pasalita at pasulat (interpreting and translation) para sa lahat ng mga komunidad sa buong estado.
Ang Multilingual NSW ay magpapahusay sa paggamit ng mga mataas na kalidad na serbisyo sa wika sa pamamagitan ng dalawang mahahalagang inisyatiba:
- Multilingual NSW Academy – nakatuon sa pagpapabuti ng pamantayan ng industriya sa pamamagitan ng patuloy na pagpapahusay ng kasanayan at pagpapadami sa bilang ng mga kwalipikadong propesyonal sa mga wikang may mataas na pangangailangan.
- Whole-of-Government Translation – nagbibigay ng mga serbisyo sa pagsasalin na may subsidiya upang matiyak na ang mga programang pinakamahalaga ay nakakarating sa magkakaibang madla sa lahat ng mga plataporma ng media.
Ang pamumuhunang ito ay sumusuporta sa pangako ng Pamahalaan ng NSW na gibain ang mga hadlang sa wika at matiyak na ang napakamahalagang impormasyon ay nakakarating sa lahat ng tao sa New South Wales.
Sa nakaraang financial year, ang programa ay:
- Nakapaghatid ng mahigit 30 mga kurso ng pagpapahusay ng kasanayan para sa mga interpreter at mga translator, kung saan ay mahigit 4,700 ang nakakumpleto sa kurso.
- Ipinagkaloob ang 248 mga scholarship sa wika, na nagpalawak sa mga kasanayan at bilang ng mga kwalipikadong propesyonal.
- Sinuportahan ang pagsasalin ng mga pangunahing kampanya ng Pamahalaan ng NSW sa pinakamahalagang mga isyu, kabilang ang pabahay, crisis communications, at karahasan sa tahanan at sa pamilya, na naihatid sa pamamagitan ng paglalathala, radyo, telebisyon, social media, at mga papel pangkaalaman.
Ang Multilingual NSW ay isang programa ng Multicultural NSW. Ang $2m pamumuhunan ay pinondohan mula sa 2025/26 budget.
