Nakahanda ka na bang bumiyahe pabalik ng Pilipinas upang makasama muli ang pamilya? O baka naman may bago kang lugar na gustong tuklasin, may reunion na dadaluhan, o okasyong nais ipagdiwang sa ibang bansa?
Saan ka man patungo, isang mahalagang kasangga sa bawat hakbang ng iyong paglalakbay ang Smartraveller – ang opisyal na travel advice service ng Pamahalaan ng Australia.
Marami sa mga Filipino-Australian ang maaaring pamilyar na sa Smartraveller. Ngunit hindi lahat ay alam kung gaano ito kapaki-pakinabang sa bawat yugto ng paglalakbay. Sa artikulong ito, tutulungan ka naming gamitin nang tama ang Smartraveller — mula sa uri at antas ng travel advice, sa mga benepisyo ng pag-subscribe sa alerts, at kung bakit ito ang unang website na dapat mong bisitahin bago ka maglakbay.
Pagkatapos mong basahin ito, mas magiging handa ka — may sapat na kaalaman para magplano ng ligtas at maayos na biyahe.
Ano ang Smartraveller?
Ang Smartraveller ay parang kaibigang sanay maglakbay — may alam sa mga dapat gawin at iwasan sa mga bansang nais mong puntahan. Naghahatid ito ng mapagkakatiwalaan at napapanahong impormasyon para sa mahigit 175 bansa, kabilang ang:
- Mga lokal na batas at kaugalian
- Mga babala ukol sa kalusugan, gamot, at bakuna
- Mga update sa seguridad at kaligtasan
- Mga tip upang makaiwas sa scam at pagnanakaw
- Mga visa at entry requirements
- Paalala ukol sa paglangoy, pakikilahok sa mga pista o party sa ibang bansa
- Mga detalye para sa Australian embassies at consulates
Kung ikaw ay may dalawahang pagkamamamayan (Filipino at Australian) o gumagamit ng parehong pasaporte, tiyaking basahin ang seksyon para sa dual nationals para sa mga gabay.
Pag-unawa sa travel advice levels
Isa sa mga pangunahing tampok ng Smartraveller ay ang antas ng travel advice para sa bawat bansa:
Level 1 – Gumamit ng karaniwang pag-iingat
Ang kaligtasan sa bansang ito ay halos kapareho ng mga lungsod sa Australia. Kailangan pa ring alamin ang mga batas at kaugalian, ngunit hindi ito mas mapanganib kaysa sa karaniwang lungsod sa Australia.
Level 2 – Maging maingat sa mataas na antas
Mas mataas ang panganib kaysa sa normal. Maaaring mahina ang seguridad o mabilis magbago ang sitwasyon. Kailangang mag-research at magdoble-ingat.
Level 3 – Pag-isipang mabuti kung kailangang bumiyahe
Mataas ang panganib sa kalusugan o seguridad. Kung hindi importante ang biyahe, ipagpaliban. Kung magpapatuloy, tiyaking may insurance at sapat na paghahanda.
Level 4 – Huwag bumyahe
Labis ang panganib. Maaaring may banta ng terorismo, karahasan, digmaan, epidemya o kriminalidad. Kung magkaaberya ka rito, maaaring hindi ka matulungan ng pamahalaan ng Australia.
Sa kasalukuyan, Level 2 ang payo para sa karamihan ng Pilipinas – mag-ingat nang mas mataas. Ngunit ang Gitnang at Kanlurang Mindanao (kasama ang Zamboanga Peninsula, Sulu Archipelago, at timog bahagi ng Sulu Sea) ay nasa Level 4 – Huwag bumyahe. Ang silangang Mindanao naman (maliban sa Camiguin, Dinagat, at Siargao) ay nasa Level 3 – Pag-isipang mabuti. Basahin ang payo ng Smartraveller bago ka magdesisyong bumiyahe.
Bakit kailangang mag-subscribe sa Smartraveller?
Kahit nakaimpake ka na at nasa eroplano, maaari pa ring magbago ang sitwasyon — gaya ng sakuna, kaguluhan, o pagkaantala sa flight.
Kapag nag-subscribe ka sa Smartraveller updates, makakatanggap ka ng libreng email alerts kung may mahahalagang pagbabago sa bansang binibisita mo. Makakatulong ito upang manatiling alerto at makapagdesisyon agad kung kinakailangan.
👉 Mag-sign up sa Smartraveller subscription page para sa isa o higit pang bansa.
Karagdagang tip: Para sa Filipino community
Para sa mga Filipino-Australian at kanilang pamilya, may espesyal na Filipino Community Hub ang Smartraveller – isang pahina na may mga gabay sa madaling salita, impormasyon tungkol sa konsulado, at mga tip para sa ligtas na biyahe.
Bisitahin ito at ibahagi sa mga magulang, nakatatandang kamag-anak o kaibigan na mas komportableng magbasa ng simpleng at kapaki-pakinabang na gabay.
Pwedeng Basahin: 👉10 tips that will make you a Smartraveller – isa pang kapaki-pakinabang na gabay sa paghahanda ng iyong susunod na biyahe.
Isang Simpleng Gawing Maaaring Magligtas sa Iyo
Bago ka mag-book ng flight, mag-apply ng visa, o magpa-sundo sa airport, bisitahin muna ang Smartraveller website.
- Basahin ang travel advice
- Mag-subscribe sa updates
- I-explore ang Filipino Community Hub
- Ibahagi ito sa mga kaanak at kaibigang maglalakbay din
Sa ilang minuto lang, makakakuha ka ng impormasyon na makakapagligtas sa’yo at magbibigay ng kapanatagan.
Maging handa. Maging ligtas. Umuwi nang may magagandang alaala sa biyahe.
Bisitahin ang Smartraveller.gov.au ngayon.
Read the English version here: Make Smartraveller your trusted travel companion.
Ang artikulong ito ay naisulat sa pakikipagtulungan sa Smartraveller – ang mapagkakatiwalaang travel advice service ng Pamahalaan ng Australia.
