Bayan kong sinilangan,
Bayan kong pintuho.
Ako ay aalis,
Iiwan ang puso.
Sa bawa’t pag-alis,
Sa bawa’t paglayo,
Puso, diwa’t damdamin,
Sikil ang siphayo.
Subalit ano ito?
Sa Lunsod at bayan,
Ng Banyagang Lupa.
Waring aking nakikita
Ang iyong sanghaya.
Di makatkat sa diwa
Ang masasayang araw
Luha, lungkot, luwalhati at ligaya
Sa piling mo, O bayan kong sinta.
Laging bumabalik, nagbabangon
Sa damdami’t gunita…
Sa bagong lupaing
Tigib ng pag-asa…
O, bayan kong sinilangan
Lupa kong hinirang.
Bayan mo, Bayan ko
Di ka tatalikdan.
Laging nakadambana,
Dito sa aking dibdib,
Magpakailanman.
Ang tulang ito na isinulat ni G. Manny G Asuncion maraming taon na ang nakararaan ay kanyang binigkas sa isang pagtitipon kasama si Ambassador Hellen De La Vega noong ika-30 ng Hulyo 2022 sa Footscray bilang alay sa pagdiriwang ng Buwan Ng Wika ngayong Agosto 2022.
PHOTO: Angelito Valdez Jr Photography
READ MORE
Filipinos in Victoria ‘Meet and Greet the Ambassador’
‘AUSTRALYANG MARILAG’: Learn the Australian National Anthem in Tagalog
